U 17. kolu Prve futsal lige Onogošt je na svom terenu poražen od Studentskog doma 3:1. To je prvi kiks Onogošta u drugom dijelu sezone.
Domaćin je imao terensku inicijativu, ali bolju igru nije mogao da kruniše pogotkom. Studentski dom se opredijelio na igru iz kontranapada i umalo da im se to isplati u 11. minutu kada je Femić pogodio stativu. Domaći sastav je nastavio sa napadima, šanse su se ređale ispred gola studenata, ali pogodaka nije bilo do poluvremena.
Onogošt je krenuo silovito i u drugom dijelu, imao par velikih prilika da povede, a onda kako to obično bude uslijedila je kazna, prvo je za Studentski dom pogodio Marković, a nedugo zatim i Čolović. Ubrzo je domaći tim smanjio preko Marka Koprivice, ali novi šok već u narednom napadu, ovaj put pogađa Femić za 3:1. Pokušao je Onogošt sa igračem umjesto golmana da sustigne zaostatak, ali se rezultat do kraja utakmice nije mijenjao.
Onogošt se nakon ovog kola nalazi na trećoj poziciji na tabeli sa 35 osvojenih bodova.
Ivan Roćenović
Foto/video: RTNK
