Onogošt je sjajno otvorio utakmicu, ređale su se šanse ispred gola gostujućeg tima sve dok Perošević nije probio odbranu rivala u 6. minutu. Veliku priliku imao je Durutović da duplira prednost, ali umjesto toga sjevnula kontra iz koje su Ulcinjani poravnali golom Dubaka. Ipak, Durutović se već u narednom napadu iskupio i vratio prednost domaćinu 2-1. Nastavio je Onogošt sa ofanzivom, u više navrata mogao do trećeg gola, ali uslijedila je nova kazna i to opet preko Dubaka koji je još jednom poravnao. U samom finišu poluvremena mogao je i Dolcinium do preokreta, ali se rezultat nije mijenjao.
Samo što je počeo drugi dio meča Onogošt vraća prednost, ovog puta precizan je bio Bečanović. Ušlo se u nešto drugačiju fazu sa puno prekršaja i bez pravih prilika. Kostić je na 5. minuta do kraja uspio da postigne gol za 4-2, a već u narednom minutu Ćulafić ponovo vraća goste u život. Odlučio se Dolcinium na igru bez golmana, ali bez uspjeha, pa je 4:3 bio konačan rezultat.
Nakon ovog kola Onogošt zauzima treću poziciju na tabeli sa 41 osvojenim bodom.
Ivan Roćenović
Foto/video: RTNK
