Predstavnice „Žena Bara velikog srca“, udruženja koje rukovodi narodnom kuhinjom u Baru, danas prikupljaju donacije u vidu namirnica ispred supermarketa „Laković“.
U najavi ove akcije one su podsjetile da su, od otvaranja narodne kuhinje 2018. godine, podijelile 322.683 obroka za nesnađene sugrađane.
„Često se kaže kako je gladan gruba riječ, no nazovimo situacije i stvari pravim imenom. Na trenutak progledajmo i pomislimo na tihu kolonu onih koji na naša vrata dolaze“, napisale su „Žene Bara“.
Ispred „HDL Laković“ one će biti danas do 21 čas i prikupljati namirnice za magacin narodne kuhinje.
„Žene Bara mole za djecu bez osmijeha, za starost bez nade u boljitak, za nevidljive a tako žive i prisutne ljude“, poručile su.
Foto: Vijesti/Marija Pešić
