Predsjednik Hrvatske građanske inicijative (HGI) Adrijan Vuksanović prokomentarisao je odluku Vlade Crne Gore da se Dom kulture „Josip Marković“ u Tivtu ustupi Hrvatskoj, kazavši da je veliki dan za Hrvate u Crnoj Gori, ali i samu Crnu Goru.
„Veliki dan za Hrvate u Crnoj Gori, ali i samu Crnu Goru! Onu Crnu Goru u koju vjerujemo i za koju se borimo. Hrvatska zajednica pokazala je značaj i odoljela je raznim pritiscima, koji su imali za cilj da nas istjeraju iz našeg prostora, a zapravo da nas omalovaže i ponize. Hvala Vladi Republike Hrvatske i premijeru Andreju Plenkoviću, koji je pokazao državnički odnos i stao u zaštitu hrvatske nacionalne manjine“, istakao je Vuksanović.
On je kazao da im je zajedništvo s njim i satisfakcija i snaga.
„Ne mogu se ne prisjetiti i brojnih ljudi diljem Crne Gore, koji su zvali i iskazivali spremnost da zajedno s nama spriječe da Hrvati ostanu bez Doma kulture. Hvala im i pamtit ćemo solidarnost koju su iskazivali. Snaga nije u broju, već u vrijednostima koje slijedite i principima koje čuvate. Hrvati nastavljaju svoju misiju, a to je očuvanje svog identiteta i snaženje državnosti Crne Gore! Dok nas ima, na Domu kulture u Donjoj Lastvi zajedno će se, jedna pored druge, vijoriti crnogorska i hrvatska zastava, i tako svjedočiti bliskost dva naroda“, naveo je Vuksanović.
Foto: Skupština Crne Gore
